Gabe didok Sibagurtano


NB:Jumolo ma hupasat hata sattabi tu akka situan natorop,di namanjaha sarita on,nda na adong tahi laho marhata rorang,manang na hurang denggan,sude bagas ni sarita on,holan humor sambing.Mauliate…

Saonari on, nunga lam moru be roha martutur na denggan, jala lam so dianturehon jolma be anggo partuturon, tarlumobi ma diakka halak naumposo. Dang haru diharingkothon be. Ba, molo sama-sama baoa, lae ma, molo tu tu anak boru ito ma, ima molo pikkiran ni sahalak baoa. Adong muse dope panjouon namasa saonari. Ces, bro, dla ninna. Dang haru binoto hata sian dia on.
“Molo ni ida jala nialaman, di kota naribur on, nunga mangalan be sude akka partuturon i. Hea ma sahalahi pajuppa iba tu dongan, dungi didokma “Marsitandaan hamu lae, sepupukku do on”. Ai gabe marpikkir iba, aha do sepupu on?. Boi pariban, boi appara, boi ito, boi inang bao, boi lae tunggane. Nunga mangalan sude….
Alai dumenggan dope i. Boha molo gabe hata na hurang tama begeon. Iba sandiri pe nga memurai dongan marhata batak, ala binoto dang diantusi ibana aha nanidok i.
Disada tikki, mulak ma siHamonangan tu huta. Dang apala piga hali ibana mulak tu bonapasogit an. Nidophon roha, ai holan goarna nama batak. Damang parsinuanna batak, alai nggo inong na tinubuhonsa halak Jogja do. Marodmu nga magodang dihuta ni oppunga bao ibana. Jala muse goarna pe marsampur, batak dohot jawa. Goar jawa dijolo, dungi di ihuthon goar batak nang marga pe. Widodo Hamonangan.
Alai, nangpe magodang Jawa, alai anggo partuturon i diboto ibana do, ala diajari among na. Songoni bahasa batak, anggo pola saotik diantusi do. Ai biar do roha ni amongna, tung so diboto ibana ma hata batak i, hape halak batak asli do ibana. Dang porsea halak molo marhatabatak ibana, hantus hatana alai anggo pardompahan sai hira halak jawa -cina.
Na tung rikkot do di ibana bonanipasogitna, jala na naeng marnida tano hatubuan ni amongna. Huhut naeng mandulo mandulo parbandanan ni oppung, OppuWidodo Hamonangan. Jala muse martahi ma ibana laho mamereng hinauli ni Tao Toba, nang haulion ni Dolok Pinapan. “Ikkon hu ida do huta ni damang i” ima didok roahana.
Disada huta di hitaan–dang pola sidok goar, annon sutong disordak hamu gottikkon. Maradi ma ibana di sada lapo, lao paulak hosa loja, minum tes huhut patordang simanjojak. Dibereng ibana dang pola piga jolam disi, holan akka ama-ama do mar satur jala na deba marnonang.
AmanJamordong, digoar deba do bayon parbalongkang, parbarita sosukkunon. Sigodang hata, siramos hata. Sian manipat ari sai holan na di lapo i.
Dipakke siHamonangan do blangkon jawa, alai datung na pataridahon, asa diboto halak ibana jawa, holan ala ni mohop ni ari do. Holan sahat ibana, tor sude pamereng ni na salapoi tu ibana. Serom otik siHamonangan, dungi dilului hundulanna. Holan lao hundul dope dibege ibana ma sada soar namandok, “Nga rone bayon, sian dia do naeng sibagurtano on…” ninna tudonganna. Arop rohana datung diantusi siHamonangan par balangkon i, nanidokna i. Nian, hordit do rohani si Hamonangan, alai di pasip. “Dang tu au ra hatai, so adong alokku di huta on” ima didok rohana.
Di uduti muse ” Oi.. parlapo, alusi Sibagurtano on…patealtealhon i, dipakke tahuluk jawa na i” ninna amanJamrodong, alai sai tu saturnai dimatahon.
Hundul ma siHamonangan dipajonok topet tu na mandok sibagurtano i, ima amanJamordong. Alai dang di patudu ibana aha na mohop dirohana. Nian diboto ibana do lapatanni sibagurtano. Alai paula so diboto. Ai parbadaan do naro molo di patumpar, hape halak na ro do ibana di luat i. Jadi dipahohom, nang pe di rohanai nunga songon na sogo. Ise na so sogo milo didok Sibagurtano atehe??….alai didok ibana ma dirohana “Paitte jo,….”
Dungi songon na disukkun ibana ma “Maaf, Pak….apa itu artinya Sibagurtano”
Ala dang sangka roha ni na mandok i sukkunonna ibana, jadi ditahi mar margabus, naso paboaonna aha lapatanni sibagurtano. Bada ma namasa.
Didok ma mangalusi ” O…kalau Sibagurtano itu, semacam panggilan akrab itu di sini, Pak” ninna mangalusi . Mekkel siHamonangan di bagas rohana. Huhut unduhunduk, dipaulahulakkon hatai.
Disurakkon siHamongan ma tu parlapo i ”Sibagurtano,….saya pesan teh manis, sekalian kuenya kalau ada”. Marrara bohi ni parlapo i, marsibollangan dohot amanJamorodong, alai asa unang adong hagunturon di pasip. Piga halak nadisi nga mekkel, alai paula dang i nadiparekkeli.
Di uduti ibana ma muse mandok tu sahalak ama ” Sibagurtano,…merokok, sekalian pinjam korek apinyalah?” huhut dipakaluar ibana ma sigaretna.
Ala didok songoni, tor naeng muruhan ma OppuJaholong, ima amanta napinangidona korek api. Sahalak doli doli mendok sibagur tano tu ibana. Naeng disonggak, haduk. Ujungna holan ungut-ungut ma didok “Babaniamam, dang sopan makkatai tunamatua” ninna.
Bah, nga lam so maradat be pakkataiaon i, alai di orom siHamonangan dibagas rohana. Didok ibana ma muse ” Sibagurtano, apa artinya babaniamam?“.
Bolak-bolak bohini oppuJaholong. Dipasip. Ai gabe amanJamordong do mangalusi” O..itu artinya terimakasih kembali, ucapan keakraban juga itu disini” ninna manggabusi.
“Oo……babaniamam” ninna bayon huhut songon na dipahulahulakkon, uhut mekkel dibagas rohana. “Maklum bapak-bapak, baru datang dari Jogja jadi tidak tahu bahasa di sini” ninna manguduti.
Dung sidung di inum ibana kopi na on, naeng hehe ma ibana sian lapo i, jala dijouhon ibana ma muse parlapo i laho manggarar tuhor ni kopi on didok ma ” Sibagurtano,..berapa kopinya” ninna huhut dibayar. Jala didok ibana ma muse tu parlapo i ” Sibagurtano, babaniamam ya”
Jala laho mangalewati akka jolma torop i, didok muse “Para Sibagurtano-sibagurtano, permisi ya. Babanimam ya semuanya, babaniamam ya sibagurtano ” ninna songon na unduk-unduk tu na salapo i. Dipakke muse balangkon na i, lao ibana.
Dung lao ibanna, tor murukan ma sude akka na disi i nang parlapo i. Songoni nang OppuJaholong, ninna ma “ima alani ho nunga gabe dohot iba Sibagurtano…ho ma jolma sibagur tano”.

Demikian Horas…….

Untuk melihat cerita humor lain nya silahkan baca artikel yang berjudul TARNGOT NI NA MARTANDANG,atau klik disini untuk membaca cerita tersebut

Tentang Bresmansilalahi

Belajar dari hal yang sangat kecil dan sederhana,untuk menemukan sesuatu yang lebih besar dan bermanfaat.
Pos ini dipublikasikan di Kisah, Uncategorized. Tandai permalink.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s