Alani Pesbuk, masa bada « latteyung



22 Mei, 2010 oleh latteung Tinggalkan sebuah Komentar

Nunga leleng NaiSumalim mangiburu. Lam jot-jot di ida ibana niloina mekkel sahalakna. Olo tuk, manipat saborngin, dang likkang heppon i sian tanganna. Anggo na somal, tor sai amaniSumalim do mambaen tadda-tadda mangarahon tu bilut. Molo nga dibaen ibana batuk-batuk, huhut hobas tu bilut, ba, nunga diattusi lapatan ni i. Nahumatop, marsihidopan. Ai molo gogo disoarahon asa modom, songon na ila rohana, ala topet disi simatuana.

Nga sabulan naiSumalim mamparateatehon pangalaho na on. Sipata, gabe ibana do mambaen tadda-tada i, alai paula so diboto amaniSumalim do. Tuk, holan heppon on nama di pagana-gana.

Ia so i, somalna di manogot, molo naeng hehe naiSumalim parjolo, sai tor dihaol do nanget, dang dipaloas dungo hatop. Masihol dope, ninna. Hape, saonari, holan dungo di manogotna, tor heppon on do dilului. Dungi didok tu naiSumalim “Pahatop i na dungo i, baen aek las, loppahon sipanganon i, naeng hatop au tu pangkalan”. ninna

Di pasip NaiSumalim do i. “Ah, ibban na heppon na baru i do i, doppon roha, ahut ni, ba ise ma donganna mar-esemes, da ollat ni amaniPojjot do?” ninna dibagas rohana.

Dang lao rohana, naung mar pesbuk amaniSumalim. Jala dang lao pikkiranna, ia niolina nang pe holan supir tebbak boi mar-pesbuk-pesbuk. Ganup ari on, holan i nama diula, mekkel sahalakna manjaha na disurat di heppon i.

Ai jaman saonari on, so pola teknologi na maju be i. Nga sude boi marinternet, marpesbuk, setting dohot akka na asing. Godang do pakkorhonna, na denggan manang na roa. Saguru tu halakna namai.

* * *

Dua ari na salpu, hatinggalan ma heppon ni amanSumalim on. Huroa, ala paborngin hu na marpesbuk on, gabe tarlalap modom ibana. Dihojoti ma lao tu pangkalan, asa sanga manarik opat rit. Dang diboto na tinggal heppon on. Peak dope di podoman nasida. Di bege naiSumalim makkuling heppon na paboahon adong esemes na baru, tor dihalaputi lao manjaha. “Paitte jo, asa hujaha, atik na adong do hallet ni on, massam-massam, ikkon hupabali sian jabu on” ninna naiSumalim.

Dijaha ibana ma isi ni esemes on, dibaen disi “Bang, anak kita sudah lahir”

Tarngongon ibana. Atik bohama na sala nomor esemes, jala tutu ma nian, dang margoar na manongos esemes on. Dipasip ibana, alai anggo di ate-atena nunga tung sukkun-sukkun. Haru hatop mulak, ikkon hupaduppar. Nian, pamotoanna, naburju do amanSumalim. Ai sian na marsitandaan nasida na jolo, datung hea dope asing-asing poangalahona.

Dungi, dua jom nai, makkuling muse heppon on, jala esemes on pe attar sarupa do tu siparjolo i “Bang, kapan ke rumah melihat anak kita” ninna. Ate-ate nise naso mohop.

Holan sahat amanSumalim di botari i, dang dope dibukka sipatuna. Nga tor di sappathon heppon on. Humordit situtu amaniSumalim “Na heppon mon, unang sai tading-tadikkon” ninna. Naeng muruk ibana, dang jadi. Ai adong do gorat tu ibana, na adong namasa. Diakkupi naiSumalim, dang pe dialusi dohot denggan.

“Buat disi, dang martangan ho?” ninna mangalusi, ala dipangido asa dibuat sipanganon. Gabe remot ni tipi do dibuat inantai, huhut manotton.
“Bah, ai dang nanggo paradeon mu sipanganon?” ninna amaniSumalim
“Dang naung mangan ho sian an?” ninna, gabe disukkun
“Mangan begu aha do, baen ma neh, nga male iba”
“Ba mangan sian nadisan ma” ninna naiSumalim, huhut sai dipanolnol simalolongna tu tipi i.
“Aha do maksudmu omak ni siSUmalim”
“Olo ma,…jaha jo esemes mi, nga tubu gelleng mu, hatop tikkir”

Marbada bolon ma nasida nadua. Nang pe nunga dibaen amaniSumalim hatorangan, alai dang dibege niolina be. “Patut do attongm sai marheppon-heppon ho ganup borngin manipat, mekkel sahalakmu, na adong do inang2 disada an” ninna. Masa ma porang. Huroa, disuba naiSumalim do manelepon tu nomor i, jala suara ni boru-boru mangalusi. Hape dung ditelepon amanSumalim, laho manukkun ise satohona, dang maralus, mate, melbok.

* * *

“Ai boasa dang nanggo alusanmu SMS hi?” ninna amanJabottar.
“Es se mes beguahai?, na dia? gok esemes, nialusan do sude” ninna amanSumalim, huhut didorguk muse tuakna sia galas pajjang i. Anggo matana dang likkang sian tipi, manotton Chelsea maralo tu Porsmuth. Huroa piga-piga ari naung salpu maresemes do amaniJabottar. Dijaman saonari on, holan ni pissit heppon on, nunga sahat be akka tona i. Dang songon na jolo rupani, ikkon paimaon dua minggu asa ro balos ni surat sian kattor pos. Molo tung pe mate heppon i, ba, disippan namarhuaso disi do i, sadihari mangolu muse.

“Apala tok pinaboa tu ho, hape lakso ro ho” ninna amanJabottar muse. Manarita ibana.

Namardongan tubu do nasida, sada arisan muse di huta i, ima arisan ni nasida samarga. Ianggo amanSumalim ima sahalak parhobas di punguan i do. Jadi tung dia pe akka namasa tu saluhut anggota ni punguan, sai dipaboa do tu ibana. Dungi ibana ma paboahon muse tu tu anggota na asing.

Dibotari i, andorang so mulak ibana tu jabu, ditahi ibana minum tuak. Ai tung hatop pe ibana tu jabu, dang adong ulaon. Ai masa dope porang, haru modom pe nunga dilabasan i ibana.

“Nion ma neh, hukirim esemes tu ho” ninna amanJabottar
“Esemes beguaha maksudmu, nandigan”
“Dua ari na salpu, paboahon naung sorang do borutta”
“Bah…ai ho do mangesemes i?, boasa asing nomormu”
“Ah, asing beguaha, ido nomorhu, naso disippan ho do” ninna mangalusi.

Tarngongon amanSumalim umbegesa.

Ai dang lao rohana, tikki mauhor heppon na imbaru, heppon na boi pesbuk, dang dipapidda akka nomor ni telepon i. Disuhuthon ibana ma namasa di jabuna. Mekkel ma nasida, nang parlapo i. “Ikkon dohot do ho tu jabu, padamehon hami, ai nga marbadabolon au dohot akkangmu, alani esemes mi” ninna.

“Taon na marpesbuk i, sai hira doli-doli do ho, atik na toho do nanidok ni akkang i, ai jaman saonari on, so subang be manippan naso sisippannon, mambunihon naso ugasan, mambungai naso sibungaan …” ninna mangalusi.
Nilai Tulisan Ini

Quantcast

0.000000 0.000000

Di


Alani Pesbuk, masa bada « latteyung

Blogged with the Flock Browser

Tentang Bresmansilalahi

Belajar dari hal yang sangat kecil dan sederhana,untuk menemukan sesuatu yang lebih besar dan bermanfaat.
Pos ini dipublikasikan di Uncategorized. Tandai permalink.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s